Биз ҳақимизда

Тошкент тиббиёт академияси даволаш факультети

 

Тошкент Тиббиёт Академияси мустақил юртимиз медицинасининг дарға олийгоҳларидан бири бўлиб, аҳолиси 30 миллиондан ошиб кетган муқаддас заминимиз фуқароларининг саломатлигини муҳофаза қилувчи,  билимлари сарҳади жаҳон андозалари даражасига етган юксак малакали шифокорларни  камолотга етказиш учун хизмат қилади. Мазкур илм даргоҳи Тиббиёт Академияси даражасига етгунига қадар бир қатор тарихий  босқич пиллапояларидан кўтарилди, кенгайди, такомиллашди. Бу жараён   Академиянинг энг нуфузли ва катта факультетларидан бири–даволаш факультетига ҳам тааллуқлидир.

Дарҳақиқат, даволаш факультетининг бугунги куни ва истиқболлари хусусида сўз юритишдан аввал унинг ўтмиши, ташкил бўлиши ва такомилга етишида холис ҳисса қўшган улуғ инсонларнинг заҳматли меҳнатларини  таъкидлаб ўтишимиз жоиздир.1919 йилнинг 13сентябрида Туркистон Давлат университети Илмий кенгашининг йиғилишида тиббиёт факультети  ташкил этилди ва унинг биринчи декани этиб тиббиёт фанлари доктори  профессор П.П Ситковский тайинланди. 1920 йилнинг 5 май куни тиббиёт факультетига 500 ўринли шифохонага эга бўлган собиқ кадетлар корпусининг биноси топширилди. Даставвал факультетда 205 та талаба 5 та курсда таҳсил олди. 1931йилга келиб Ўрта Осиё Давлат университетининг  тиббиёт факультети йириклашиб, алоҳида ўқув ва илмий тадқиқот  муассасига айланди ва шу йили  тиббиёт факультети алоҳида институтга айлантирилди. Бу даврга келиб институтда 177 та ўқитувчи фаолият юритиб, 1049 та талаба таҳсил олган. 1935йилда Ўрта Осиё тиббиёт институтининг номи Тошкент тиббиёт иститутига ўзгартирилди. Унинг таркибида 4 та факультет ташкил этилиб, шулардан бири даволаш-профилактика факультети кейинчалик даволаш факультети номи билан атала бошланди.

Факультет декани бўлиб қуйидаги ҳодимлар фаолият олиб боришган: Н.И.Рагоза (1931-1936 йй), С.Г.Хаскин (1937-1939 йй), П.А.Недрит (1939-1940 йй), А.С.Волынский (1940-1952 йй), А.М.Геллер (1952-1954 йй), А.Х.Ходжаев (1954-1955 йй), И.Ю.Ласков (1956-1959 йй), С.А.Долимов (1959-1962 йй), А.И.Магрупов (1962-1964 йй), М.И.Гаспарян (1964-1965 йй), Н.М.Мажидов (1966-1967 йй), М.А.Ашрапова (1967-1968 йй), Р.М.Нурмуҳамедов (1969-1971 йй), А.И.Мўминов (1972-1980 йй), Н.Х.Шомирзаев (1980-1982 йй), К.Н.Нажмутдинов  (1982-1987 йй), М.Х.Қориев (1987-1990 йй).

Турли йилларда факультет декани муовини этиб қуйидагилар:  Т.Г.Султонов,К.Н. Нажмиддинов, Х.Ё. Каримов, А.Н. Данияров, Б.К.Саидқориев,  Карабаева, А.А. Йўлдошев, И.Ш. Шукуров, М.К. Мақсудов, А. Шарафиддинов, И.М. Муллажонов, Ш.А. Абдураҳмонов, Р.М. Музаффаров, А.М. Ҳакимов, С.Н.Нуритдинов, И.К.Ҳошимов, Б.Ш.Шоисломов, Х.С. Ходиев, Б.Б.Цветков, Я.Ю.Муҳамедов  И.Г.Азимов, Ф.Н.Абдуллаев, Э.Э.Назаров, А.Э.Аширматов, Т. А.Янбаева, К.Д. Жабборов, В.А.Суюмов, У.А.Болтабоев, Ш.М.Мурзабеков,М.А.Аҳмедов, О.М.Садирхонов, З.С.Шаҳабутдинов, А.Э.Аширматов, А.Йўлдошев, И.Я.Тошхўжаев, П.С.Зуфаров,А.А.Абраров, М.М.Асадуллаев, Н.Х. Шарафитдинходжаев, Х.Б Магзумов, Ш.Р Алиев,Х.М. Маруфханов, С.Т.Турсуновлар тайинландилар.

1990 йил 23 майида Ўзбекистон Республикаси Вазирлар кенгашининг қарорига мувофиқ Тошкент Давлат Тиббиёт Институти негизида иккита тиббиёт олий ўқув юрти – биринчи ва иккинчи Тошкент Давлат Тиббиёт Институтлари ташкил этилди. Биринчи ТошДавТИ даволаш факультетида  М.М.Мирсаматов (1990-1998 йй), Т.Х.Қаюмов (1998-2005 йй), Р.Ж.Усмоновлар (2005) декан лавозимида иш олиб боришди.

Худди шу даврда Иккинчи ТошДавТИ даволаш факультетини қуйидаги профессорлар бошқардилар: П.И.Тошходжаев (1990-1992 йй), А.М.Ҳакимов (1992-1998 йй), Ш.Я.Зокирходжаев (1999-2004 йй), О.Р.Тешаевлар (2004-2005йй) факультетни бошқардилар.

2005 йилда Ўзбекистон Республикаси Президенти И.А.Каримов фармонига асосан ташкил этилган Тошкент Тиббиёт Академиясининг даволаш факультетида профессорлар О.Р.Тешаев (2005-2006 йй), Қ.И.Расулев (2006-2008 йй), С.П.Абдуллаев (2008-2011 йй), Б.Т.Халматова (2011-2014 йй), П.С.Зуфаров (2014-2017 йй) декан вазифасини бажаришди. 2017 йил март ойидан бошлаб факультетни профессор Б.Т.Халматова бошқариб келмоқда.

Турли йиллар мобайнида Тошкент Тиббиёт Академияси даволаш факультетида С.Х.Матчанов, Г.Е.Тастанова, У.К.Касимов, А.Р.Шермуродов, Х.Х.Пулатов, Х.Б.Ибодов, Б.Е.Худойберганов,А.К.Турсунбоев, Р.Х.Умаров, З.Н.Бобоева, М.И.Шамсутдинова, И.И.Баҳриев, Ш.А.Боймуродов, У.А. Жўраев, У.Р.Файзиева, К.З.Яҳяева, И.М.Алланазаров, Ж.Ш.Хайтимбетовлар декан муовини лавозимида фаолият юритдилар.

Хозирги кунда даволаш факультетида Ш.Ш.Массавиров, Б.Қ.Нормуродов, Ё.Б.Гулямов, Ж.М.Аҳмедов, Н.Ш.Ниёзова ва А.И.Хатамовлар декан муовини вазифасида ишлаб келмокдалар.

Даволаш факультети  умумий амалиёт шифокорларини тайёрлайди. Унда республикамизнинг турли ҳудудларидан келган юзлаб талабалар тахсил оладилар. Талабалар учун факультетда барча шароитлар яратилган бўлиб, талабалар турар жойлари ўзининг намунавийлиги бўйича республикамизнинг етакчи илм даргоҳлари қаторида туради. Тошкент тиббиёт академияси ташкил топгандан буён даволаш факультетини 3500 га яқин талаба битириб, тиббиётнинг турли сохаларида ўз фаолиятларини давом эттирмоқдалар.

Даволаш факультетининг 15 кафедрасида 300 дан ортиқ олий малакали мутаҳассислар – профессорлар, доцентлар, ассистентлар меҳнат қилиб келмоқдалар. Улар орасида ўзининг тўплаган билим ва тажрибаларини ёш педагоглар ва талабаларга бера олувчи, дунёга машҳур илмий мактаб ва йўналишларнинг вакиллари бор. Уларнинг илмий салоҳияти ҳам салмоқлидир. Жумладан, ўтган 10 йил мобайнида факультет кафедраларида 32 нафар ходим фан докторлиги, 121 нафар ходим эса фан номзодлик диссертациясини муваффақиятли ҳимоя қилган.18 та ихтирога муаллифлик гувоҳномаси олинган, тиббиётнинг турли мавзулари бўйича 65 та дарслик ва монографиялар чоп этилган, услубий  тавсиялар ва қўлланмаларнинг сони эса 500 дан ортиқ. Жорий йилллар мобайнида 70 та рационализаторлик таклифи киритилган бўлиб, уларнинг барчаси тиббиётнинг турли жабҳаларидаги даволаш ва диагностика муаммолари ечимига қаратилган. 60 дан ортиқ патентга муаллифлик гувоҳномалари олинган, тиббиётнинг турли муаммолари ечимига қаратилган  5 та информацион хат тайёрланган. Олис ва яқин хориж мамлакатлари илмий журнал ва тўпламларда 1000 га яқин илмий мақолалар чоп этилган, республика миқёсида чоп этилган мақолалар сони эса 2000 дан ортиқ. Хорижда ва республика миқёсида 3000 дан ортиқ тезислар чоп этилган. Профессор –ўқитувчилар томонидан  давлат грантлари асосида 18 та лойиҳа бўйича иш олиб борилган.

Бугунги кунда даволаш факультетига 15 та кафедра бириктирилган:

  1. Патологик анатомия кафедраси
  2. Ички касалликлари пропедевтикаси кафедраси
  3. Умумий ва болалар жарроҳлиги кафедраси
  4. 1-сон факультет ва госпитал терапия кафедраси
  5. 1-сон факультет ва госпитал жарроҳлик кафедраси
  6. 1-сон болалар касалликлари кафедраси 
  7. 2-сон болалар касалликлари кафедраси
  8. Отоларингология ва стоматология кафедраси
  9. Неврология кафедраси
  10. Офтальмология кафедраси
  11. Анестезиология ва реаниматология кафедраси
  12. Урология кафедраси
  13. 2-сон ички касалликлар кафедраси
  14. Хирургик касалликлар кафедраси
  15. 2-сон акушерлик ва гинекология кафедраси

Халматова Барно Турдиходжаевна тиббиёт фанлари доктори, профессор       1-сон болалар касалликлари кафедраси мудири. 4 та дарслик, 3 та монография,  4 та ўқув қўлланма, 180 дан ортиқ илмий ишлар, 50 дан ортиқ услубий қўлланмалар муаллифи.